各位點傳師，各位同仁，承蒙天恩師德，前人的慈悲，各位組長與及各位點傳師的成全，後學奉黃點師之命，今晚有個寶貴機會上來學習一課，

基於道大理微，後學對道義認識膚淺，一息間學習中有不圓滿的地方，懇請黃點師慈悲補充完滿，各位同仁原諒。

1#

奉黃點師之命，後學今日繼續和大家一同學習《韓湘子全傳》這本書。

睇黎今晚大家都仲係現場參與，上一課兩首詞可能都未啟發到我哋飛仙住，最多都係有幾個飛Zoom啫。

唔知大家有冇試過凌晨三點仲有野諗瞓唔着？或者日光日白，有野做又好冇又好，反正就眼光光，個腦好似玩緊左右互搏术喺度打交，一個叫你行東，一個叫你向西。呢種狀況而家有個詞，叫「內耗」。如果你試過，恭喜你，你已經企喺道教內丹嘅門口喇。

今晚我哋又再黎睇下鍾呂二仙，教俾湘子嘅兩首詞：《五更轉》同《梧桐樹》。

一聽到入面啲字——「龍虎」「鉛汞」「坎離」，反正後學一開始就唔知講緊乜，因為後學當年說來慚愧，化學練丹啲科目不嬲都係唔合格嘅，咁所以只可以試下用另一個角度去理解呢兩首詞，

唔講你唔知，原來兩首都係用「一夜到天明」嚟講一個人，點樣由內在混亂，一步一步走向清明。就好似一張心境地圖咁，我地可以用黎睇自己。

2#

先講「五更」。以前將一夜分做五段，叫五更：一更係夜啱啱深，五更就係天光之前。由一更行到五更，即係由全黑，行到天明。一條好清楚嘅曲線。

呢兩首詞用「五更」，想畫一條心靈嘅曲線——由雜亂，行到清明。一更，係你心入面最亂嘅一刻；五更，係你終於清楚嗰一刻。中間嗰幾更，就係變化嘅過程。

呢個設定本身都好有意義：黑夜，唔係敵人，係必經之路。冇人係一跳就到天明嘅。你而家有幾亂、幾迷惘，都唔緊要——因為嗰啲，只係一更，唔係終點。

3#

咁另一方面：內丹，究竟係咩？

响後學嘅眼中，內丹唔係教你煉一粒仙丹出嚟食。佢係用煉丹嘅語言，去講一個人點樣改變。古代煉丹要揀材料、落鼎爐、較火候；內丹就借呢套語言，講內在嘅轉化。所以你可以咁理解：內丹，就係古人用嚟描述內在轉化嘅一套象徵語言。

當然，喺道教傳統內部，又真係有人去理解為實際操作方法，或者去用黎做化學實驗嘅基礎，唔係純粹比喻。不過今晚，我哋用思想角度嚟讀，睇吓佢點樣幫我哋理解人、理解自己。

內丹嘅結構，分三層。

第一層，原料：你本來嘅狀態——心猿意馬、情緒衝突、精神散亂。

第二層，過程：唔單止收返散咗嘅精神，仲係重新組織，將打架嘅力量重新排位。

第三層，結果：嬰兒、玄珠、金雞叫——全部係象徵，講你內在整合完成，而唔係一次性終點，係持續成熟。

4#

嘩咁去理解會唔會好跳躍思維呀？

唔係冇根據𠺢。瑞士著名心理學家卡爾·榮格（Carl Jung）在二十世紀中葉發現，中世紀煉金術士表面上是在精煉黃金，但他們在實驗室入面記錄的怪異符號、怪獸、國王與王后的結合，實際上是人類潛意識（Unconscious）的投射。煉金術的目的「將賤金屬變成黃金」，本質上就是心理學上的「自性化」（Individuation）——即是一個人如何整合內心陰暗面，活出最完整、最真實的自己。

所以你會發現：原料係心性嘅陰陽，過程就係五更嘅行進，結果就係天明嘅成熟。

5#

好，我哋由《五更轉》開始。

5a#

一更：端坐，即係坐低，唔再向外跑。你回想吓自己：幾時真正「端坐」過？唔係瞓喺梳化碌手機嗰隻坐，係真係停低嗰種。慢慢調龍虎——龍同虎，就係你心入面兩股拉扯嘅力量。一個叫你衝，一個叫你縮；一個係衝動，一個係顧慮。調，唔係打死其中一隻，而係等佢哋唔好再打。呢個意象，翻譯做現代語言就係：建立內在秩序。唔使即刻平定天下，先叫停場仗。

二更，過渡：「陰陽真氣妙……自然匹配了。」對立嘅嘢，開始唔再互扯，自然咁夾返埋。

5b#

三更，係呢首詞嘅核心。留意「根苗」呢兩個字——唔係話已經有咗成果，係啱啱發芽。種子落地，生出最先嗰條白根。但呢一刻，稍縱即逝：鉛遇癸生，急採方為妙。即係話，契機係有時效性嘅。靈感嚟嗰陣你唔寫低，過咗就冇；諗通咗一件事，唔即刻做，轉頭又打回原形。

咁即係點呢？改變，往往由一個細到唔覺嘅臨界點開始。你唔會突然變第二個人；你係喺某個深夜，突然「叮」一聲，然後要即刻接住。接唔住，就冇咗。

四更，過渡：「坎離要顛倒……位產玄珠。」舊嘅秩序被翻轉，新嘅嘢開始成形。一句講晒：習慣改咗，境界先至嚟。

5c#

五更，收尾。留意：結尾冇神仙，冇飛天。係金雞、牧童、牛。餵飽隻牛，快活瞓一覺。呢度又係一個好值得我哋深思嘅點：真正覺醒，唔係離開人間，係返到人間——但係已經唔再係以前嗰個人。最平凡嘅日常，就係修行嘅終點。翻譯做現代語言：成熟咗嘅人，唔係成日好 high；係該做嘢做嘢，該瞓覺瞓覺。

呢首《五更轉》，係一個宇宙規模嘅故事——龍、虎、金鼎、乾坤，全部係大角色。但係呢個宏大敘事，到底係由邊個角度睇嘅？就係「你」自己。

6#

如果話《五更轉》係宇宙戲，呢首就係第一人稱嘅內心戲。

6a#

一更：心猿意馬——心似猿猴跳嚟跳去，意似野馬四圍跑。現代人最大嘅問題，唔係冇能力，係注意力渙散。碌手機碌兩個鐘，以為自己休息，其實個心冇停過一秒，眼都眨少左一半！（15-20 per min to 5-6）。牢拴係，即係綁實佢，唔係打死隻猴，係唔好俾佢亂跳。翻譯做現代語言：收返你嘅注意力。呢個，係一切改變嘅起點。

二更，過渡：「一道靈光漸通透。」漸，就係慢慢。覺察開始形成，唔係一下開竅。

6b#

三更：一陽動——靜到盡頭，第一下生機動。呢度唔重複講轉折，因為《五更轉》已經講過；你只要記得：金花，係由「動」嗰一下開始。

6c#

四更：月，係安靜嘅光。玉鏡，係唔會因為照到靚嘢醜嘢而變形嘅鏡。處處同——無論外界點變，你嘅心保持同一份清明。翻譯做現代語言：唔係世界變咗，係你睇世界嘅方式變咗。同樣嘅老闆、同樣嘅功課，你唔再咁容易俾佢哋牽住走。

停一停，問吓自己：你而家，喺邊一更？

如果你成日覺得悶局、冇方向，做咩都提唔起勁——你可能仲停喺一更，心喺度亂跑，未開始收返嚟。如果你開始穩定咗，每日有啲固定日程，但總係覺得差緊啲嘢、未見到突破——你大概企喺三更門口：種子啱啱落咗地，但根苗未穩。如果你發現，最近面對以前會激嬲你嘅嘢，居然冇咁容易上頭——恭喜你，你可能已經行到四更，月亮開始升高。

冇邊一更係錯嘅。五更唔係目的地，係自然行到嘅地方。唔使等人話我地知，我地問自己就知。

6d#

五更，收尾：雲收徹——遮蔽全部散晒。瓊花結——處處開花，唔係一枝，係全面成熟。最後四個字：莫把天機泄。點解唔好講出嚟？因為真正嘅體悟，講唔出。你可以同人講「月亮好靚」，但講唔出你親眼見到嗰種感受，呢度亦都有啲「於法實無所得」嘅意境。

覺察本身，已經有轉化嘅力量——你唔需要靠把口證明自己改變咗。你變咗，你自己知，身邊嘅人會睇到。

《梧桐樹》由心猿意馬，寫到瓊花結——係一條完全向內嘅路。而《五更轉》由龍虎，寫到金雞叫——係一條面向天地嘅路。兩首詞，一首話你聽生命點樣慢慢成熟，一首話你聽成熟之後，個心變成點樣。

講到呢度，大家記唔記得，韓湘子兩位師父，係點樣傳呢兩首詞俾佢？係咪先唱《五更轉》，再唱《梧桐樹》。

呢個次序，原來都唔係亂嚟㗎。點解呢？

《五更轉》，佢用嘅係宇宙角色——龍、虎、金鼎、乾坤。好似一套大戲，角色多，場面大。

《梧桐樹》呢？佢用嘅係內心狀態——心猿意馬、靈光、玉鏡。冇乜角色，淨係一個人，喺度睇住自己。

先話俾你聽，成個宇宙係點樣運作；然後先至教你，返去自己個心度做功夫。就係咩呢：先明大道，後修心性

7#

所以「先破暗，後成熟」，呢個係一個好重要嘅邏輯上嘅次序：你要先睇清自己點解會亂，先至有資格講點樣去改變同成熟。

總結

古人用五更嚟講嘅嘢，我哋每個禮拜，可能每日都經歷緊。都係响個不見五指嘅黑夜跌跌撞撞。 有時撞撞下，又天光左。

咁希望經過呢一課，我哋都能明白到，唔需要咁多玄幻野，先識得唔好再內耗自己，先識得將自己分裂嘅部分，重新整合返埋。

如果我哋而家喺黑夜——唔代表我哋行錯路。只係，行緊去天光嗰條路啫。

好啦，今晚我們在這一課，總算學完左《韓湘子全傳》的第四回。之後我哋又去睇吓湘子之後又如何啦。

後學今日學習到呢到。 基於道大理微，後學學習中有不圓滿的地方，懇請黃點師慈悲補充圓滿指正，各位同仁多多原諒！